LAOAG CITY – Maproblemaan dagiti sumagmamano a mannalon iti ili ti Nueva Era kalpasan a na-welding ti pangalaanda ti danum.
Segun ken ni Barangay Chairman Jondie Bayudan, ABC President iti ili ti Nueva Era, maladingitan unay isuna gapu ta awan metten ti pangalaan ti danum a pangsibog kadagiti mulada a mais ken nagduduma pay a produkto agrikultura kadagiti kataltalonanda iti Barangay Sto. Niño iti nasao nga ili.
Inbatadna a saanda a kayat a maikkan isuda ti maikeddeng nga aldaw wenno oras iti panangala ti danum no diket ipaayan dagitoy ti umdas a danum a pagbibingayanda a mannalon.
Inlawlawagna a nakapinpintas ti resulta dagiti mula dagiti mannalon iti ili ti Banna maidasig dagiti inmulada a taga Nueva Era nga arig nalaylayen gapu iti kinakurang ti pagpadanumda.
Inpettengna a kalikagumna a masolbar daytoy nga arungaing dagiti padana a mannalon tapno saan a matay ken maperdi dagiti inmulada a nagduduma a produkto agrikultura a maminpinsan.
Kunana nga ikidkiddawda kadagiti dadduma a zanjera iti ili ti Banna a maipaayanda ti bukudda a pangalaan ti danum para iti taltalonda.
Innayon ni ABC President Bayudan nga awan ti napintas a koordinasion ti maseknan a zanjera kadakuada maipanggep iti agdama a sangsangoenda a parikot.
