LAOAG CITY – Umaboten iti 67 a tattao ti natay iti pannakauram ti maysa a shopping centre iti Gul Plaza iti ciudad ti Karachi idiay Pakistan.
Inbatad dagiti otoridad a malaksid kadagiti natay ket adda pay ti 77 a sabsabali dagiti nagtalinaed a mapukpukaw kalpasan ti insidente.
Basar iti report, immabot iti 24 nga oras kalpasan a naan-anay a nasebseban ti apoy.
Ti Gul Plaza ket addaan ti agarop 1,200 a shop ken ita a gundaway ket maibilang kas wedding season iti Karachi.
Agpapan ita ket saan pay a masinunuo no ania ti namonganayan ti uram, ngem basar kadagiti nakakita iti sibubukel a napasamak ket awan ti fire exits iti pasdek isut gapuna a naggiinnipit dagiti naruay a shoppers a nangpakaro ti didigra.
Segun ken ni Shop owner Rehan Faisal, arigna nagpaot laeng ti lima agingga iti pito a minute ket napukaw aminen a naipundar da.
Kabayatanna, inpakaammo ni Senior police official Syed Asad Raza nga adda ti 16 a fire exits ti pasdek ngem amin dagitoy ket nakalock idi napasamak ti uram.
