LAOAG CITY – Nagkari ni House Majority Leader Ferdinand Alexander “Sandro” Marcos nga iyalisto ken paigetan ti disiplina iti Kamara de Representantes iti panaglukat manen ti sesyon inton bigat, aldaw ti Lunes, Enero 26.
Target ti kababaan a pagpandayan linteg iti babaen ti panangidaulo ni House Speaker Faustino “Bojie” Dy III a maipasa ti nabatbati a 36 a priority measures manipud iti 48 a Legislative-Executive Development Advisory Council bills ti administrasion Marcos.
Inbatad ni House Majority Leader ken Ilocos Norte Rep. Sandro Marcos, maipangpangruna dagiti reporma nga addaan ti direkta nga epekto kadagiti pamilia a Pilipino partikular iti sektor ti agrikultura, salun-at, edukasion ken social welfare.
Karaman kadagiti tutukan ket dagiti amendment iti Rice Tariffication Law, Universal Health Care Act, Pantawid Pamilyang Pilipino Program (4Ps) ken ti panangiyalisto ti pannakaipasdek kadagiti classroom.
Inpettengna a kadagiti napalabas a sesyon, nakaipasan ti Kamara de Representantes ti 12 a Legislative-Executive Development Advisory Council measures ken sumurok 80 a dadduma pay a gakat kas ti kampante isuna a mapagtalinaed ti kinaalisto a panagtrabaho para iti pagsayaatan ti publiko.
Inruar ni Majority Leader Marcos dagiti dadduma pay a napapateg a gakat iti babaen ti Legislative-Executive Development Advisory Council a kalikagum a lippasen ti Kamara de Representantes.
Karaman ditoy ti Anti-Political Dynasty bill, Party-list System Reform Act, Cybersecurity Act, Right to Information bill ken ti panangipawil kadagiti kabagian ti opisial kadagiti kontrata ti gobierno.
Adda pay iti listaan ti modernisasion ti Bureau of Immigration, excise tax iti single-use plastics ken dagiti linteg para iti digital payments ken Artificial Intelligence iti eleksion.
Innayon ni Marcos a tutukan ti Kamara de Representantes ti naiget a deadline ken al-alisto a tignay tapno maidanon dagiti reporma a namnamaen ti publiko.
