LAOAG CITY – Nasawaren dagiti otoridad ti 14 a lokasyon iti nagduduma a paset ti pagilian iti agtultuloy nga isaysayangkat da a manhunt operation kontra iti pugante a negosyante a ni Charlie “Atong” Ang.
Segun iti Criminal Investigation and Detection Group–National Capital Region, nakaawat da ti sumuruk-kumurang nga 40 nga impormasyon nga adda ti pakainaigan iti lokasyon ni Ang, karaman dagiti report a maipagarop a garaw na sakbay a naiparuk-at ti warrant of arrest.
Karaman kadagiti nagturungan a lugar dagiti otoridad ket iti Calabarzon, Central Luzon, Bicol Region, ken Metro Manila, idinto nga adda pay ti sumagmamano a lokasyon iti Maynila a maberberipikar paylaeng.
Ni Ang, a maibilang nga armado ken napeggad kadagiti otoridad, ti kakaisuna laengen a saan pay a naarestar iti 22 nga indibidual nga addaan ti warrant mainaig iti panagpukaw dagiti mammallot.
Kitkitaen pay dagiti otoridad ti posibilidad nga addan iti sabali a pagilian ti pugante, kas iti Cambodia wenno Thailand, ngem agtultuloy latta ti panagbirbiruk da ditoy uneg ti Pilipinas.
Basar iti nailian a pulisya, narigat ti panangarestar da ken ni Ang gapu iti kalawa ti impluwensya ken resources na, ngem inpetteng da nga agtultuloy ti operasyon tapno magun-od ti hustisya para kadagiti mapukpukaw a mammallto ken ti pamilya da.
