LAOAG CITY – Saan manen a nagatendar ni Sen. Ronald “Bato” dela Rosa iti panagsubli ti session ti Senado idi kalman, aldaw ti Lunes.
Manipud idi Nobiembre ket saan a simrek ni dela Rosa.
Iti maysa nga ambush interview, sakbay iti panaglukat ti session, inbatad ni Senate President Vicente Sotto III nga awan pay ti nangngegna manipud ken ni dela Rosa.
Iti kinapudnona, kuna ni Sotto a masdaaw isuna no kasano a napirmaan ni dela Rosa ti report nga insubmitir ti minority bloc mainaig kadagiti panagdengngeg nga inwayat ti blue ribbon panel mainaig iti maanomalya a flood control projects.
Inlawlawagna a saan met pay a nakikoordinar ni dela Rosa kenkuana agpapan iti daytoy a gundaway.
Saan a nagatendar ni dela Rosa iti session ti Senado sipod idi Nobiembre 11 kalpasan a nai-report a nangiparuk-aten ti warrant of arrest ti International Criminal Court kontra kenkuana.
Sumangsango ni dela Rosa iti kaso a crime against humanity mainaig iti nagbalin a papelna idi panawen ti nadara a gubat kontra iti droga ni dati a Presidente Rodrigo Duterte.
