LAOAG CITY – Inlawlawag ni Barangay Chairman Samuel Ramirez, ti Barangay Valdez iti ili ti Banna no apay a na-welding ti pangalaan ti danum dagiti sumagmamano a mannalon iti ili ti Nueva Era.
Segun kenkuana, daytoy ket kalpasan a maipagarup a kanayon a takawenda ti danum uray nalpasen ti schedule ken batang dagitoy nga agpadanum kadagiti kataltalonanda.
Gapu iti daytoy, napagnunumoan dagiti miembro ti gunglo dagiti zanjera a ma-welding laengen tapno maliklikan ti panangtakawda ti danum.
Inpettengna a napanna dinanon ni Barangay Chairman Jondie Bayudan, ti ABC President iti ili ti Nueva Era tapno ipakaammo ti pannaka-welding-na ti pangalaan ti danum.
Inbatadna a masansan a saan nga agat-atendar dagiti mannalon iti ili ti Nueva Era dagiti maisaysayangkat a taripnong isut gapuna a saanda nga ammo dagiti maipatpatungpal nga schedule iti agdama.
Kunana nga isuda pay ti masansan nga agdaldalus iti pagayusan ti danum tapno maikkat dagiti basura wenno dagiti makaabbeng iti daytoy.
Mainaig iti daytoy, inpasingked ni Kapitan Ramirez nga adda ti schedule iti kada gunglo dagiti mannalon iti panagpadanum manipud iti Barangay Sto. Niño iti ili ti Nueva Era agingga iti Barangay Tabtabagan iti ili ti Banna no sadinno nga adda ti 43 a pakabuklan a gunglo ti mabenepisiaran iti irigasion.
Innayonna a saan daytoy a napan nangsidir ken saan a nabartek idi napan nakisarita ken ni Kapitan Bayudan.
Naammoan nga adda ti naikeddeng a panagtatarinong inton bigat, aldaw ti Mierkoles, Enero 28 dagiti mannalon iti Barangay Sto. Niño iti ili ti Nueva Era ken iti Barangay Tabtabagan iti ili ti Banna nga idauluan ti National Irrigation Administration tapno mapagsasaritaan a naimbag ti saanda a panagkikinnaawatan.
Maipalagip a maproblemaan dagiti sumagmamano a mannalon iti ili ti Nueva Era kalpasan a na-welding ti pangalaanda ti danum.
