LAOAG CITY – Mabalin a maisardeng ti panagsweldo ni Senador Ronald “Bato” dela Rosa gapu iti nabayag unayen a saanna nga iseserrek iti senado no sadinno a nangrudi pay idi Nobyembre 2025.
Daytoy ti inbatad ni Senate President Pro Tempore Panfilo “Ping” Lacson, kagiddan ti panangibaga na a masapol nga adda ti rekomendasyon ti Senate ethics committee.
Iti ambush interview, inpakaammo ni Lacson a nagturong iti senado ni dati a Senador Antonio Trillanes IV tapno makipagkita kadakuada ken ni Senate President Vicente “Tito” Sotto III.
Kuna na a karaman kadagiti napagsasaritaan da ket ti plano ni Trillanes a mangipila ti ethics complaint kontra ken ni dela Rosa intono Marso ita a tawen.
Innayon na a mabalin nga usaren daytoy ti senado iti possible a panangirekomendar ti ethics committee a mangamendar ti pagannurutan para iti pannakaipataw ti sanctions kontra ken ni dela Rosa.
Segun ken ni Lacson, maysa kadagiti maisingsingasing ket ti pannakasuspenso wenno pannakaisardeng ti panagsweldo ni Senador dela Rosa.
Maipalagip a nangrugi a naglangan ni dela Rosa iti senado kalpasan nga inrakurak ni Ombudsman Jesus Crispin Remulla a maipagarop nga addan ti inparuk-at ti International Criminal Court (ICC) nga arrest warrant kontra kenkuana mainaig iti nadara a kampanya kontra iti illegal a droga kabayatan ti Duterte administration, no sadinno a daytoy ti nagserbi idi kas chief ti Philippine National Police (PNP).
