LAOAG CITY – Manamnama a maipatungpalen iti mabiit ti nairakurak itay napalabas a tawen a pannakaipangato ti salary grade dagiti permanente ken casual nga empleado ti gobierno probinsial nga adda pay laeng iti salary grade 1 ti sueldo dagitoy.
Inlawlawag ni Mrs. Fe Siazon, Provincial Human Resource Management Officer a dagitoy ti kaadduan a nairaman iti ordinansa nga inaprobaran ti Sangguniang Panlalawigan a nakaipalaonan dagiti naruay a mabuangay a posision iti nagdumaduma a pangopisinaan ti kapitolio probinsial.
Mainaig iti daytoy, umabot iti 344 nga empleado, permanente wenno casual ti naipangato ti salary grade dagitoy.
Kadagupan dagiti nadakamat nga empleado, 268 ti naipangato manipud iti salary grade 1 ket napan iti salary grade 2 ken kaadduan kadagitoy ti manipud iti Sangguniang Panlalawigan.
Naammoan a sumarsaruno a kaadduan dagiti Provincial Security Guards, Gov. Roque B. Ablan Sr. Mem. Hospital ken ti Provincial Agriculture Office idinto a dagiti dadduma a pangopisinaan ket addaan ti siam agingga iti maysa nga empleado.
Inpasigurado ni Siazon a kalpasan a maipatungpal daytoy a pannakaipangato ti salary grade dagiti nadakamat nga empleado ket saan pay laeng a malabsing ti “Personal Services (PS) cap limitation” ti Provincial Government of Ilocos Norte.
Kabayatanna, inpakaammo ni Sangguniang Panlalawigan Member Hanson Chua a ti pakadagupan ti maipaay a sueldo dagiti naipangato ti salary grade-na nga empleado pakairamanan dagiti sumagmamano a nabuangay a posision ket 83,906,038.20 a pisos.
