LAOAG CITY – Inpakaammo ni Mrs. Mary Joan Pasugui, ti City Social Welfare and Development Office ditoy siudad ti Laoag nga ad-adda pay a dimmur-as dagiti nagduduma nga aktibidad ken programa gapu iti ad-adda a pannakailatang ti pundo iti opisinada.
Segun kenkuana, makunana a napintas ken ad-adda a dimmur-as dagiti programa, aktibidad ken serbisio para kadagiti umili gapu ta maysa kadagiti kangrunaan a naiyalokaran ti pundo dagiti social services.
Inbatadna a dagiti naipangato iti pundo iti social services ket karaman iti livelihood assistance, medical, burial ken dadduma pay.
Kunana a nasayaat gapu ta maysa kadagiti nailatangan iti dakkel a pundo ti social services nangruna ket naruay dagiti umili ti agkasapulan ti nagduduma a tulong.
Innayonna a babaen iti daytoy ket ad-adda a maipadanon ti husto a serbisio kadagiti umili ditoy siudad ti Laoag.
