LAOAG CITY – Agtultuloy iti panangbiruk ti lokal a gobierno ditoy siudad ti Laoag ti lote a pangipatakderan ti Super Health Center.
Segun ken ni Dr. Rodrigo Catcatan, mangidadaulo ti City Health Office ditoy siudad ti Laoag, awan pay ti nakitada a bakante a lote a mabalin a pangipasdekanda ti Super Health Center.
Inbatadna a ti kasapulan a lote a nasken a mabirukanda ket adda ti kalawana a 1,000 square meters nga isunto met ti maipakita iti Department of Health tapno mapundoanda.
Kabayatanna, mangnamnama ni Dr. Catcatan a daytoy ket maipursigeda iti kabiitan a panawen tapno adda ti nayon a pagkamangan dagiti umili nga agkasapulan iti serbisio medikal.
Immuna iti daytoy, naammoan nga umabot iti 15 a milyon a pisos ti pundona daytoy manipud iti Department of Health no sadinno a ti laeng pannakabingay ti lokal a gobierno ket ti lote a pakaipatakderan ti Super Health Center.
