LAOAG CITY – Sinuportaran ti Philippine Coast Guard (PCG) ti takder ni Presidente Ferdinand Marcos Jr. a saan a basta laeng nga ideklarar a persona non grata ti asinoman a diplomat.
Daytoy ket kagiddan ti panawagan nga ideklarar a persona non grata ni Chinese Ambassador to the Philippines Jing Quan gapu iti agtultuloy a tension ken panagsinnukat dagiti rakurak iti nagbaetan dagiti sumagmamano nga opisial ti Pilipinas ken ti Chinese Embassy.
Inbatad ni Philippine Coast Guard Spokesperson for the West Philippine Sea Commodore Jay Tarriela, iti baet a silulukat ti Pilipinas iti dayalogo, saan nga agsardeng ti ahensia iti panangprotekta ti karebbengan ken seguridad dagiti masakupan a teritorio.
Mainaig iti daytoy, kuna ni Tarriela a maipagarup a liklikan ti Chinese Embassy Deputy Spokesperson Guo Wei ti pudno nga isyu ti maipagarup nga iligal, agresibo ken dagiti manangallilaw a tignay dagiti sumagmamano a barko ti China iti West Philippine Sea.
Inpetteng ni Tarriela a maiyataday kadagiti kinapudno nga ebidensia dagiti irakrakurakna kas ti panagusar ti water cannon, panangdungpar, panangtutok ti military-grade lasers ken delikado a panagmaneobra a mangitunda ti peggad kadagiti mangngalap a Pilipino.
Kunana a ti agtultuloy a saan a panangbigbig ti China iti United Nations Convention on the Law of the Sea (UNCLOS) ken iti 2016 Arbitral Award ti mangitunda ti problema iti relasion ti dua a pagilian ken saan a ti ar-aramiden a transparency ti Pilipinas tapno depensaan ti teritorio ken dagiti umili.
