LAOAG CITY – Sinungbatan ni House Committee on Public Accounts Chair Terry Ridon ti Korte Suprema ken kinaritna nga urnosen nga unaen ti bukud a backlog sakbay a babalawen ti Kongreso mainaig iti impeachment.
Inpalagip ni Ridon iti Korte Suprema ti pammilin iti 1987 Constitution a nasken a solbaren dagiti kaso iti uneg laeng ti 24 a bulan manipud iti panangisubmitir kadagiti pleadings.
Inaramid a pangarigan ti agpanpanday linteg ti nabayagen a nakapenpen a petision mainaig iti non-contact apprehension policy nga agingga ita ket awan pay ti pinal a desision.
Innayon ni Ridon a sakbay a kwestionaren ti Korte Suprema ti lehislatura iti maipagarup a panagal-alisto kadagiti impeachment complaints, nasken a siguradoen nga umuna ti Korte Suprema a matungtungpal daytoy ti bukud a deadlines iti panangsolbar kadagiti kaso.
