LAOAG CITY – Nai-reschedule inton Pebrero 10 ti promulgation iti kaso ti dati a Mayor iti ili ti Dingras a ni Marinette Gamboa.
Segun ken ni Atty. Juanito Antonio, abugado ti dati a Mayor, daytoy ket kalpasan a saan a personal a nakaatendar ti klientena gapu ta naitaray daytoy iti ospital idi laeng kalman.
Inbatadna a kabayatan nga adda iti “out of town” ni Gamboa ket maipagarup a kellaat a ngimmato ti blood pressure daytoy a nangitunda ti pannakaospitalna.
Gapu iti daytoy, kunana a saan a natuloy ti promulgation wenno iti pannakaiparuk-at ti desision ti korte a naikeddeng ita nga aldaw.
Mangnamnama ni Atty. Antonio nga agbalin a napintas ti resulta iti maiparuk-at a desision mainaig iti kaso ni Gamboa.
Kabayatanna, inpakaammo ni Atty. Joel Garcia, maysa pay kadagiti abugado ni Gamboa, inpetteng ti hues a gapu ta seryoso daytoy a kaso ket masapul a nasken a “physically present” nga agatendar ti akusado iti korte.
Inlawlawagna nga adda ti naipatulod kadakuada nga abugado ni Gamboa a medical certificate a pammaneknek a saan a makaatendar ti akusado.
Innayonna nga awan ti nakitana a private complainants a napan nagatendar iti nasao a promulgation.
Maipalagip a sumangsango ni Gamboa iti kaso a murder gapu ta maitudtudo isuna a mastermind wenno akin-utek iti pannakapapatay ni dati nga Ilocos Norte Electric Cooperative wenno INEC President Lorenzo Rey Ruiz idi 2009.
Naammoan a nagpiyansa ti 400 a ribu a pisos ni Gamboa para iti temporario a pannakawaya-wayana idi Disiembre 2023.
Immuna iti daytoy, natiliw ni Gamboa idiay Calamba, Laguna babaen kadagiti kameng ti National Capital Region Police Office (NCRPO) babaen iti bileg ti warrant of arrest nga inparuk-at ni Judge Felix Salvador gapu iti kasona a murder.
