LAOAG CITY – Manamnama ti pannaka-establisar ti Onion Cold storage facility iti ili ti Bacarra.
Segun iti Provincial Agriculturist a ni Engr. Teresa Bacnat, ti nasao a pasilidad ket agbalor ti P101-milyon a pisos, ken aggapo daytoy iti world Bank babaen ti Philippine Rural Development Project ti Department of Agriculture, no sadinno a 20% wenno nasurok 20 a milyon a pisos ti nasao a kantidad ti counterpart ti probinsia.
Inlawlawag ni Bacnat nga ipresentarda ti proposal iti maikatlo a lawas ti Pebrero ita a tawen iti regional project advisory board ken iyuray da ti signal no kaanu a marugyan ti pannakaestablisar ti nasao a pasilidad gapu ta nakasaganan ti mausar a pondo.
Inbatad na a dakkel a tulong ti pasilidad kadagiti mannalon iti nasao nga ili aglalo ket maibilang ti lugar kas “Onion Producing Town” gapu ta saanen a kasapulan nga aggastos da tapno mapreserba dagiti produkto da para iti “trading”.
Kabayatanna, saanto laeng a sibuyas ti mabalin a maipan iti nasao a pasilidad no diket mabalin pay ti sabali a produkto.
Immuna iti daytoy, naipasa ti maysa a resolusyon a mangipalubos kenni Gov. Cecilia Araneta Marcos, a makipinnirma ti lease agreement iti mangimanmanihir iti Bacara Multi-Purpose Cooperative nga isu ti paka-establisaran ti Onion Cold storage facility.
