LAOAG CITY – Umad-ado dagiti kameng iti kamara de representantes a nangirakurak ti suporta na iti nailungalong a linteg a “no work, no pay” kadagiti kongresista babaen ken ni House Majority Leader Sandro Marcos.
Inpetteng ni Kamanggagawa Partylist Rep. Elijah San Fernando a ti House Bill 7432 wenno ad-adda a mabigbig kas “No work, no Pay for Members of Congress Act” ket suportado na gapu ta no dagiti ordinaryo a Pilipino a saan a sumsumrek iti trabaho ket sigurado nga awan ti sweldo da idinto a dagiti kameng ti kongreso ket buo latta ti maawat da a benepisyo wenno sweldo, sumrek da man wenno saan iti trabaho.
Inpetteng na a masapol a maiyaplikar met ti “no work, no pay” para kadagiti naelektaran nga opisyal ti pagilian.
Innayon na a ti nasao nga addang ket mangipakita a seryoso ti kamara de representantes a mangipatungpal kadagiti reporma ken panagbalbaliw iti biang dagiti agpanpanday linteg.
Malaksid ken ni Fernando ket inrakurak met ti “Young Guns” iti Kamara de representantes ti suporta na iti nailungalong a linteg ken kuna na nga idi koma paylaeng a naipatungpal daytoy kas panangipaay ti proteksyon kadagiti tax payers, mapatibker ti accountability ken maisubli ti panagtalek ti publiko iti kababaan a pagpandayan linteg iti kongreso.
Iti met biang ni Lanao Del Sur Rep. Zia Alonto Adiong, chairman ti House Committee on Suffrage and Electoral Reforms, inrakurak na a ti nailungalong a “no work, no pay” iti miembro ti Kamara de representantes ket maysa a wagas tapno dagiti agpanpanday linteg ket maipada kadagiti ordinaryo a Pilipino a mangmangged.
Kabayatanna, ibilang ni Deputy Speaker Jay Khonghun ti Zambales, a ti nasao a gakat ket mangipakpakita laeng ti disiplina iti biang dagiti agpanpanday linteg.
