LAOAG CITY – Sumango iti dua a kaso ti caretaker ti pagtaraknan kadagiti manok iti Barangay Poblacion iti ili ti Nueva Era.
Nabigbig ti suspek a ni Jumar Cortez, agtawen ti 42, agpapaay pay kas caretaker ti maysa a telecommunications company ken residente iti nasao met laeng a barangay.
Segun ken ni P/Capt. William Sotelo, Hepe ti Nueva Era Municipal Police Station, daytoy ket kalpasan a naglabsing ti suspek iti Republic Act No. 10591 wenno ti Comprehensive Firearms and Ammunition Regulation Act ken iti Republic Act No. 9165 wenno ti Dangerous Drugs Act of 2002.
Inbatadna a balligi a naarestar ti suspek kalpasan a naglako ti pito nga heat sealed transparent plastic sachet a naglaon ti maipagarup a shabu iti police poseur-buyer nga agbalor ti 6,800 a pisos.
Nakumpiskar pay dagiti otoridad manipud iti suspek ti maysa a calibre 38 a paltog nga addaan ti tallo a bala.
Kunana a nangrugi a minonitorda ti suspek idi Agosto iti napalabas a tawen kalpasan a nakaawatda ti impormasion manipud kadagiti met laeng kakaduana a nagsubli daytoy iti iligal nga aktibidad.
Inlawlawagna a malaksid laeng nga aglaklako ti iligal a droga ti suspek ket rumrummuar nga agus-usar pay daytoy no sadinno a posible a maipagarup a mangal-ala ti suplay ti iligal a droga idiay probinsia ti Ilocos Sur gapu iti pannakipallotna ngem manarimaan pay laeng a maberberipikar.
Inpettengna a maibilang kas Street Level Individual ti suspek ken datin a natiliw daytoy gapu met laeng iti iligal a droga ngem nakaruar iti pagbaludan babaen ti plea bargaining.
Inpaganetgetna a nakadawyanen dagiti amin nga agbalbalin a suspek iti operasionda a naipabulsa laeng kadagitoy dagiti ebidensia kontra kadakuada.
Innayonna nga idepensanto lattan ti bagi ti suspek iti Korte maipanggep iti kaso kontra kenkuana.
Kabayatanna, ti nasao nga operasion ket nagballigi babaen iti nagtitipon a puersa ti Provincial Drug Enforcement Unit, Banna Municipal Police Station, Maritime Group ken Nueva Era Municipal Police Station kas lead unit.
Maipalagip a manarimaan ti panangikondision ti suspek kadagiti sumagmamano a manok a para iti pallot gapu ta makilaban daytoy idiay Magsingal, Ilocos Sur inton Lunes idi kellaat nga adda ti nagsardeng a dua a lugan iti kalsada no sadinno nga adda ti dua nga indibidual ti bimmaba ken nagsaludsod dagitoy kenkuana no aglaklako isuna ti manok.
Immuna iti daytoy, nakumpiskar dagiti otoridad kabayatan ti panagkapkapda iti suspek ti wallet nga adda dagiti sumagmamano nga heat sealed transparent plastic sachet a naglaon ti maatap a shabu.
Malaksid iti daytoy, naala pay manipud iti suspek ti sling bag nga adda met dagiti sumagmamano nga heat sealed transparent plastic sachet a naglaon ti mapapati a shabu, maipagarup a maysa a calibre 38 a paltog ken balbala ken dadduma pay a drug paraphernalia.
