LAOAG CITY – Inpaganetget ni Navotas Representative Toby Tiangco iti National Bureau of Investigation (NBI) a mangipatulod ti high level delegation iti International Criminal Police Organization (Interpol) Headquarters idiay France.
Daytoy ket tapno ad-adda a naiget iti panangtutok iti kiddaw a Red Notice kontra ken ni dati nga Ako Bicol Party-list Rep. Elizaldy Co tapno malimitaran ti garaw daytoy ken mabirukan ti paglemlemmenganna.
Saan a mapnek ni Tiangco iti addang ti gobierno tapno maipasubli ditoy pagilian ni Co ken sangoen dagiti alegasion mainaig iti budget insertions ken panangala ti kickback manipud iti maanomalya a flood control projects.
Inpetteng ni Tiangco, nasken nga ad-adda a pursigido ken agresibo ti gobierno a mapagsungbat ni Co.
Kunana a kabayatan nga awan ti Red Notice ni Co ket ad-adda a nawaya daytoy a makagaraw ken makaplanplano no kasano a libasan dagiti kaso a naipila kontra kenkuana.
