LAOAG CITY – Naikeddeng a rugyan dagiti drayber ti tren idiay Train Spain ti three-day nationwide strike kas panagprotesta da iti ibilang da nga awan ti kasiguradwan ti kinatalged ti rail system iti nadakamat a pagilian.
Daytoy ket kalpasan ti dua a nagsaruno a nakaro a panagdinnungpar ti dua a tren idi Enero ita a tawen.
Immuna a napasamak ti insidente iti Adamuz a nakatayan ti 46 nga indibidual idinto a ti maikadwa nga insidente ket napasamak met iti asideg ti Barcelona a nakatayan ti train driver ken nakasugatan ti dinosdosena a sabsabali pay.
Gapu iti daytoy, kalikagom ti Semaf, ti train drivers’ union, nga agala ti ad-ado nga staff ken nayunan ti puunan ken maintenance tapno mapasayaat ti rail system ti Spain.
