LAOAG CITY – Inrakurak ti Department of Agriculture (DA) nga ad-adalen na ti panangipangato na ti taripa iti artificial sugars kas nayun nga addang tapno papigsaen ti demand para iti lokal nga asukar.
Iti laeng kallabes ket nagdesisyon ti ahensya nga iyalud-od ti ban iti sugar importation agingga intono Disyembre 2026 tapno maprotehiran dagiti lokal a mannalon ken ti industriya ti asukar.
Basar iti Department of Agriculture, ti nangato a panagusar kadagiti imported sweeteners kas ti high-fructose corn syrup ket makaapektar iti demand ti lokal nga unas.
Innayon ti ahensya a ti possible a pannakaipangato ti taripa ket makitkita a wagas tapno makissayan ti pannakaiserrek dagiti synthetic sweeteners iti merkado.
Kabayatanna, iti datos ti Sugar Regulatory Administration (SRA), sumaysayaaten ti supply ti lokal nga asukar ngem nagtalinaed a karit ti nababa a presyo gapu iti kompetisyon manipod iti artificial sugars.
