LAOAG CITY – Palubosanen ti admission dagiti miembro ti Philippine Health Insurance Corporation (PhilHealth) iti pay ward ti ospital a kontrolado ken ipatpataray ti Department of Health (DOH) basar ken ni Senate Minority Leader Alan Peter Cayetano.
Naragsakan ni Cayetano ti addang a palubosan dagiti miembro ti PhilHealth a ma-admit iti bakante a pay ward bed iti pampubliko nga ospital nangruna no napunnon ti basic ward.
Inbatad ni Cayetano, positibo ti addang gapu ta nasken a nabayag daytoyen nga ipalpalubos iti babaen ti maipatpatungpal a pagannurotan.
Iti napalabas a tawen, dinakamat ni Cayetano iti panangtalantan ti 2026 budget ti Department of Health ti isyu no kasano nga imatmatonan dagiti pampubliko nga ospital dagiti katre nangruna no napunno ken agsisinnelsel dagiti pasiente.
Iti panagdengngeg ti pundo, sinaludsod ni Cayetano ni Health Secretary Teodoro Herbosa mainaig kadagiti gundaway nga adda ti bakante a pay ward bed uray napnon ti basic ward nangruna kadagiti pampubliko nga ospital.
Sungbat ni Herbosa, mabalin nga iyakar dagiti pasiente iti pay ward no adda ti bakante nangruna no adda ti panagdudupudop.
Nupay kasta, kunana a nakadepende daytoy iti pagalagadan ti tunggal ospital.
