LAOAG CITY – Nagballaag ti Food and Drug Administration iti publiko mainaig iti panagusar ti peke nga agas a Purified Rabies Vaccine.
Ti nasao a batch ti Speeda ket addaan ti rehistrado a katukad ti produkto a legal a mailaklako iti merkado.
Nabalakadan dagiti amin nga healthcare professionals ken publiko maipanggep iti panagraira ti nasao a peke nga agas iti merkado a mabalin a mangitunda ti risgo iti salun-at dagiti agusar daytoy.
Naballaagan ti publiko a gumatang laeng kadagiti establishimento a lisensiado ti Food and Drug Administration.
Nabalakadan pay dagiti amin nga establishimento a saan nga aglako kadagiti peke nga agas.
Maiyataday iti Republic Act No. 9711 wenno ti Food and Drug Administration Act of 2009, ti panagaramid, panagangkat, panaglako, panangipaay, panangiyakar ken panangitandudo ti produkto a para iti salun-at nga awan ti maiyannatop nga otorisasion manipud iti ahensia ket maipawil.
Nagutigot dagiti amin a Local Government Units (LGUs) ken Law Enforcement Agencies (LEAs) a siguradoen a daytoy a peke a produkto ket saan a mailako wenno mausar iti masakupanda a lugar.
