LAOAG CITY – Kalikagum ti uppat a kongresista ti binulan a tulong pinansial dagiti pamilia nga awanan ti pagtaengan ditoy pagilian.
Gagem a maipaayan ti ₱3,500 a subsidy para kadagiti awan ti pagnaedanda idiay Metro Manila idinto a ti gatad para kadagiti adda iti dadduma a paset ti pagilian ket tingitingen ti Department of Human Settlements and Urban Development (DHSUD) ken National Economic and Development Authority (NEDA).
Nakailanad ditoy iti House Bill number 7230 wenno gakat a Rental Housing Subsidy Program Act nga inlungalong da Representatives Martin, Yedda ken Andrew Romualdez pakairamanan ni Rep. Jude Acidre.
Kalikagum ti gakat a maikkan dagiti pamilia a bassit ti mapaspastrekda wenno dagiti naawanan ti pagtaengan a maaddaan ti nalaka ken napintas a pagabangan.
Iti babaen ti gakat, maipatungpal ti rental housing subsidy program kadagiti informal settler families.
Agpaut ti subsidy a maipaay kadakuada agingga a malpas ti permanent housing project a naikeddeng kadakuada.
