LAOAG CITY – Natay ti driver ti motorsiklo kalpasan ti panagdinnungparda iti closed delivery van iti paset ti C5 road iti Barangay 20 iti ili ti Sarrat.
Ti driver ti closed delivery van ket taga idiay probinsia ti Ilocos Sur idinto a manarimaan pay laeng ti panangberipikar dagiti otoridad ti pakabigbigan dagiti nakalugan ti motorsiklo.
Segun ken ni P/Cpt. Ashley Cacayorin, Hepe ti Sarrat Municipal Police Station, kabayatan a dumaldalyasat ti motorsiklo nga agturong nga agpa-laud ket kellaat a dimmungpar ti closed delivery van nga agturong met nga agpa-daya.
Inbatadna a segun iti palawag ti driver ti closed delivery van kadakuada ket adda ti sarsarunoenna a maysa met laeng a motorsiklo a linisyanna a nangitunda ti panagdinnungparda ti nakamotorsiklo.
Nupay kasta, inlawlawagna a basar iti naalada a Close Circuit Television wenno CCTV camera footage ket rumrummuar nga immagaw ti closed delivery van ti linya iti kalsada ti nakamotorsiklo ken awan ti linisyanna a motorsiklo.
Mainaig iti daytoy, kuna ni P/Cpt. Cacayorin a naitaray ti kinalubbon ti driver ti motorsiklo iti Dingras District Hospital ngem naiyakar iti Mariano Marcos Memorial Hospital and Medical Center iti siudad ti Batac kalpasan a natukkol ti maysa kadagiti sakana.
Innayonna a manamnama a sumango iti agsusukot a kaso a Reckless Imprudence Resulting in Homicide, Physical Injuries ken Damage to Property kontra iti driver ti closed delivery van.
