LAOAG CITY – Inadmitir ti pamilya Padron iti ili ti Bacarra ti nagkamalian da mainaig iti pannakaipawil ti miembro da a ni Mr. Jaymar Padron nga ipasada pay ti tricycle na.
Daytoy ket kalpasan a naduktalan a ti driver’s license ni Jaymar Padron ket peke ken nag-overcharge pay kalpasan a 20 a pisos ti siningirna iti maysa nga estudyante.
Segun iti ama a Padron, ti lisensya ti anakna ket innala da idiay Cagayan, ngem saandan a makitkita pay ti nagpatulongan da idi para iti daytoy.
Immuna iti daytoy, nagreklamo ni Jaymar Padron ditoy Bombo Radyo Laoag kalpasan a napawilan nga agpasada pay ti tricycle gapu ta maysa a person with disability.
Nupay kasta, naamoan ti Bombo Radyo Laoag iti Philippine National Police a ti kangrunaan a rason ket gapu ta peke ti lisensya na.
Kabayatanna, inkari ti ama a Padron a saanen nga agpasada pay ti anak na, no sadinno nga inkari met ti hepe ti nailian a pulisya iti ili ti Bacarra nga ikkan na ti pamastrekan ti maseknan, banag a dakkel ti panagyaman ti pamilya Padron.
