LAOAG CITY – Inpasigurado ni Rep. Zia Alonto Adiong, Chairman ti House Committee on Suffrage and Electoral Reforms ken pannakabagi ti Lanao del Sur a balbaliwan ti Anti-Political Dynasty Bill ti landscape ti pulitika ken panangidaulo iti Pilipinas.
Segun kenkuana, umabot iti 5,000 a posision iti national ken lokal a gobierno ti mabakantean no agbalin a linteg ti House Bill No. 8389 wenno ti Anti-Political Dynasty Bill.
Inbatadna a tapno masigurado a maiyataday iti nadagsen nga ebidensia ti gakat nga inaprobaran ti komite, nakikammayetda iti Socioeconomic Research Bureau (SERB) iti babaen ti Congressional Policy and Budget Research Department ti House of Representatives of the Philippines.
Inlawlawagna nga inadal ti Socioeconomic Research Bureau ti election data manipud iti Commission on Elections (COMELEC) a sakupen kadagiti provincial, district ken municipal positions.
Rimmuar iti panagadal a 54% wenno 9,852 manipud iti 17,983 local-level positions ket okupado dagiti miembro ti political dynasty.
Dinakamat ni Adiong a tugma ti nasao nga assessment iti datos ti League of Municipalities of the Philippines a mangipakpakita ti 61% wenno 917 iti 1,493 a Mayor iti pagilian ket addaan ti immediate wenno extended family members nga addaan met ti iggem nga elective office.
