LAOAG CITY – Inaprobaranen ti Land Transportation Franchising and Regulatory Board (LTFRB) ti panangipatungpal ti panagngato ti plete para kadagiti pampubliko a transportasion kangrunanna kadagiti jeep ken bus gapu iti nagsasaruno a big time oil price hike.
Basar iti Land Transportation Franchising and Regulatory Board, siguradon ti pannakaipatungpal ti nayon a plete ngem kunana a dumaldalan pay laeng iti panangberipikar iti Department of Transportation (DOTr) no mano ti iyimplimentar a fare hike.
Malaksid iti daytoy, inbatad ti Land Transportation Franchising and Regulatory Board a sakup ti fare hike dagiti amin a nangipila ti petision para iti daytoy ngem saan pay laeng nga iraman iti anunsio dagiti taxi ken UV Express kalpasan a nangipasa dagitoy ti petisionda iti laeng kallabes.
Inlawlawag ti ahensia, kasapulan pay daytoy a dumalan kadagiti hearing ken nationwide consultation program sakbay daytoy nga aprobaran.
Kabayatanna, naikeddeng nga ianunsio inton Martes, Marso 17 no mano ti pagngatoan ti plete kadagiti pampubliko a transportasion.
