LAOAG CITY – Mangipatulod ti Estados Unidos ti rinibribu a nayon a marines ken sailors iti Middle East kabayatan nga agtultuloy ti tension iti rehion basar kadagiti opisial ti Amerika.
Segun kadagiti source, umabot iti sumurok-kumurang 2,500 a marines ti karaman iti expeditionary unit a nasapsapa a naipatulod manipud iti West Coast ti Amerika.
Gagem a papigsaen ti kabaelan ti Estados Unidos para iti posible nga operasion iti rehion nupay awan ti desision a mangipatulod ti tropa iti uneg ti Iran.
Adda ti sumurok-kumurang 50,000 United States troops nga immunan a naka-deploy iti Middle East ken manayon pay daytoy ti Marine Expeditionary Units.
Basar kadagiti opisial, posible nga usaren dagiti nasao a puersa para kadagiti nagduduma nga operasion pakairamanan ti air strikes wenno ground deployment no kasapulan.
Kabayatanna, masukatan ti USS Bush ti aircraft carrier USS Ford kalpasan a naitantan ti operasion daytoy gapu iti maintenance ken pannakadadaelna.
