LAOAG CITY – Nakanselar ti klase ti tallo a pagadalan ditoy siudad ti Laoag pakairamanan ti Ilocos Norte National High School, Ilocos Norte College of Arts and Trades ken Shamrock Elementary School ita nga aldaw, Marso 26 kalpasan a nakaawat dagitoy ti maipagarup a bomb threat.
Segun ken ni Mr. George Emman Manuel, Administrative Officer V ti Department of Education – Schools Division of Laoag City, nagdesision ni Dr. Joann Corpuz, Schools Division Superintendent ti Department of Education – Schools Division of Laoag City a naan-anay nga ikanselar ti klase dagiti nasao a pagadalan kabayatan a maiwaywat ti naun-uneg nga imbestigasion dagiti otoridad.
Inbatadna nga agarup alas nuebe idi rabii, Marso 25 idi nakaawat ti Schools Division of Laoag City ti impormasion mainaig iti maipagarup a bomb threat nga inpatulod ti maysa a kabagian ti maysa kadagiti estudiante ti Ilocos Norte National High School no sadinno a sinalusodna kadakuada no ania daytoy nga impormasion nga agwarwaras iti group chat dagiti agad-adal iti Ilocos Norte National High School ken Ilocos Norte College of Arts and Trades.
Inlawlawagna nga apaman a nakitada ti nasao nga impormasion ket insigida nga inpakaammoda daytoy ken Dr. Corpuz ken kadagiti otoridad.
Kunana a manarimaan ti panangduktalda no asino ti adda iti likudan ti nangipatulod ti mensahe a mangibagbaga nga adda ti inmulada a sumagmamano a bomba kadagiti nadakamat a pagadalan.
Inpettengna a kabayatan ti panagsukimat dagiti otoridad ket awan ti nakitada a bomba wenno aniaman a naimula a pagpabettak.
Mainaig iti daytoy, inpasingked ni Manuel a nagbalin a natalged dagiti atleta a manarimaan a naka-in house iti Ilocos Norte National High School ken Ilocos Norte College of Arts and Trades para iti panagsagsagana iti Region 1 Athletic Association.
Innayonna a saanna met pay a masinunuo no agsublin ti klase kadagiti tallo a pagadalan inton bigat gapu ta nakadepende ti agbalin a resulta iti imbestigasion dagiti otoridad.
