LAOAG CITY – Inpakaammo ti maysa a Private Lawyer a ni Atty. Juanito Antonio a saan a maiyannatop ti panangawag ni Rep. Gerville Luistro, Chair ti Committee on Justice a mini-trial ti impeachment proceedings ni Vice President Sara Duterte.
Inlawlawagna a saan a mabalin nga usaren ti nasao a termino gapu ta makatikaw nangruna ket adda met dagiti masursurot a proseso kabayatan iti panangtingiting ti impeachment complaint.
Inbatadna a saan a rumbeng nga usaren ti termino a trial gapu ta ti akem laeng ti Committee on Justice ket tingitingen no adda ti makaanay nga ebidensia dagiti reklamo kontra iti Bise Presidente tapno ituloy iti panangtratar iti daytoy.
Immuna iti daytoy, inawagan ni Rep. Luistro ti mini-trial ti impeachment proceedings ni Vice President Sara banag a saanna a pagbabaywan ti insawangna a sarita.
