LAOAG CITY – Natay ti lima a pulis a kameng ti Provincial Mobile Force Company kalpasan a natambang dagitoy ti Shariff Aguak.
Daytoy ti nakumpirmaran a pimmusay maibasar iti impormasyon manipod ken ni PNP-BARMM spokesperson Capt. Steffi Salanguit.
Napasamak ti panagtambang iti paset ti Barangay Mother Poblacion, Shariff Aguak, Maguindanao del Sur pasado ti oras ti alas 9:00 idi rabii.
Inpakaammo ni Salanguit a dagiti biktima ket dagiti kameng ti 2nd Provincial Mobile Force Company ti Maguindanao del Sur PNP.
Basar iti report, nakalugan dagitoy iti PNP Mobile car nga addaan ti body number 767, idi tambangen ida dagiti suspek kabayatan ti panagsubli dagitoy iti Camp Datu Akilan, Maguindanao Del Sur Police Provincial office manipod iti panagpatrolya da iti Shariff Aguak town proper.
Naamoan a walo dagiti pulis a nakalugan iti nasao a patrol mobile, lima kadagitoy ti natay a pakairamanan da Pat Kenneth Perocho, Pat Al-Fatah Marohom, Pat Amil Bangsa, Pat Arsenal Sivih, Pat Sayed Ridwan idinto a nakalasar met da PLT Alfred Gregory, PSSg Adam Kamarudin Kansi, ken Pat Abubakar Lauban nga agdama nga agpapaimbag iti ospital.
