LAOAG CITY – Namnamaen ti New NAIA Infra Corp. (NNIC) nga umabot iti sumurok 1.35 a milyon a pasahero ti sumangpet iti Ninoy Aquino International Airport iti panawen ti Holy Week travel surge manipud Marso 28 agingga iti Abril 5.
Basar iti projection ti eropuerto, umabot iti 1,353,265 ti pakabuklan a bilang ti pasahero iti uneg ti siam nga aldaw apagapaman a nangatngato maidasig iti 1,326,730 a nairekord idi Semana Santa iti napalabas a tawen.
Nupay kasta, kuna ti New NAIA Infra Corp. a nababbaba daytoy iti immuna a namnamaen gapu iti pannakasuspenso ti sumagmamano a flights ken pananglimitar iti operasion iti Middle East routes.
Mainaig iti daytoy, nangipatungpal ti New NAIA Infra Corp. ti nagduduma nga addang pakairamanan ti nayon a personnel iti check-in counters, immigration ken security areas, naig-iget a koordinasion iti airlines ken ground handlers, panangpaatiddog ti oras ti passenger assistance desks ken real-time monitoring ti panagdudupudop iti terminals.
Kaadoan a pasahero ti namnamaen inton Abril 5 nga umabot iti 158,884 kagiddan ti Marso 28 nga addaan ti 157,804.
Manamnama nga agtalinaed iti sumurok 143,000 ti daily passenger volume iti sibubukel a travel period.
Iti tallo a terminals, posible nga iti Terminal 3 ti addaan ti kadakkelan a paset ti trapiko nga addaan ti 712,932 a pasahero, sumaruno ti Terminal 2 a 346,342 ken Terminal 1 a 293,990.
Binalakadan ti New NAIA Infra Corp. ti publiko a tingitingen ti flight advisories, mangiyalokar ti nayon nga oras iti biahe ken sumangpet a nasapa iti eropuerto.
Naabisoan pay dagiti international passengers a kumpletoen ti eTravel registration-da sakbay nga agturong iti eropuerto airport tapno maliklikan ti pannaka-delay.
