LAOAG CITY – Inrakurak ni House Committee on Justice Vice Chairman ken Bukidnon Rep. Jonathan Keith Flores a posible a malpasdan ita a bulan ti Abril dagiti impeachment hearings tapno maammoan no adda ti probable cause ti maikatlo ken maikapat nga impeachment complaint kontra ken ni Vice President Sara Duterte.
Inbatadna a nupay inkeddeng dagiti panagdengngeg ti komite inton Abril 14, 22 ken 29 ket mabalin daytoy a maipababa wenno mapaalisto.
Inlawlawagna a no mapasamak daytoy ket maiprisentar nga insigida ti komite iti plenario ti report iti panagsubli ti session manipud inton Mayo 4.
Inpettengna a ti iwaywayat a panagdengngeg ita ti komite ket maidasig iti preliminary investigation ken saan a maibilang a panangtingiting.
Innayonna nga arisiten dagiti testigo ken kitaen no ania kadagiti alegasion ti nasken nga iraman iti articles of impeachment.
