LAOAG CITY – Inparuk-aten ti Commission on Elections (Comelec) ti Calendar of Activities para iti kaunaan a Parliamentary Elections iti Bangsamoro Autonomous Region in Muslim Mindanao.
Basar iti resolusion ti poll body, inton Mayo 5 agingga Mayo 7, maisayangkat ti panangipila ti certificates of candidacies.
Manipud Hulio 16 agingga Setiembre 29, maipatungpal ti election period no sadinno nga epektibo ti gun ban, panangipawil iti panagsinnukat ken panangbukel kadagiti baro a presinto ken panangiyakar wenno panangsuspenso kadagiti empleado ti gobierno nga awan ti pammalubos ti Commission on Elections.
Manipud Hulio 30 agingga Setiembre 12, maiyuswat ti campaign period sakbay ti eleksion inton Setiembre 14.
Manipud Setiembre 4 agingga iti mismo nga aldaw ti eleksion, naiget nga ipawil ti Commission on Elections ti panangiparuk-at ti pundo malaksid iti medical ken burial assistance.
Maysa a bulan kalpasan ti eleksion wenno inton Oktubre 14 ti maudi nga aldaw para iti panangipasa ti Statements of Contributions and Expenditures wenno SOCE dagiti timmaray iti Bangsamoro Autonomous Region in Muslim Mindanao Elections.
Maipalagip a pinirmaan ni Presidente Ferdinand Marcos Jr. idi Marso ti linteg a mangikeddeng iti umuna a Bangsamoro Autonomous Region in Muslim Mindanao Elections iti maikadua a Lunes ti Setiembre ita a tawen.
