LAOAG CITY – Inbatad ni Mayor James Bryan Alcid a mabalin nga ad-adda a makita a ti kinapateg dagiti kalesa ditoy ciudad ti Laoag ita a panawen a dakkel ti nagngatoan ti presyo dagiti produkto a petrolyo.
Kuna na a mabalin a makita ti kinapateg dagiti kalesa gapo ta ada met ti dadduma a wagas a mabalin nga aramiden dagiti tattao a panaginot.
Mainaig iti daytoy, inpakaamno ti mayor nga idi nagtakem kas chairman ti Committee on Transportation idi 12th Sanggunian ket nakita na nga awan ti nadalos nga ordinansa para iti kalesa ditoy ciudad.
Inbatad na nga adda ti pondo ngem awan ti linteg para iti pannakaipaay ti naan-anay a tulong wenno suporta kadagiti kutsero.
Gapo iti daytoy, nakisarita ni Alcid kadagiti kutsero ditoy ciudad ti Laoag tapno matulongan dagitoy a mairehistro para iti pannaka-intitutionalize da ken maikkan ti pondo a makatulong a mangpreserba ti kalesda ditoy ciudad.
Inpetteng na a no saan a kastoy ti aramiden ti gobierno lokal ditoy ciudad ket agamak amangan no mamimpinsan a mapukaw dagiti kalesa.
Maipalagip nga iti kallabes ket nagbalin a tampok ti champion performance ti ciudad ti Laoag iti Tan-ok Festival ti kalesa no sadinno nga inrakurak ti Tourism Office a daytoy ti mangipasimudaag a ti kalesa ti maysa nga iprayoridad ti agdama nga administrasyon.
