LAOAG CITY – Inrakurak ni Israeli Prime Minister Benjamin Netanyahu a prioridad ita ti Israel ti panangparmek iti impluwensia ti Hezbollah iti Lebanon kagiddan ti agtultuloy a tension iti Middle East.
Iti baet ti agtultuloy a tension iti rehion, inbatad ni Netanyahu a nakasentro ti Israeli forces iti Bint Jbeil nga inawaganna a kangrunaan a kuta ti Hezbollah iti southern Lebanon.
Ti gubat iti nagbaetan ti Israel ken Hezbollah nga am-ammo a supsuportaran ti Iran ket naminsan a kimmaro ti military operations ti United States-Israeli strikes kontra iti Iran idi Pebrero 28 a maipagarup a nagrugian ti nalawlawa a gubat iti Middle East.
Kagiddan daytoy, inbatad ni Netanyahu nga agtultuloy ti koordinasion ti Israel ken Estados Unidos maipapan iti Iran pakairamanan ti panagikkat iti enriched nuclear material ken panangipaay ti limitasion iti nuclear capabilities ti pagilian.
Kunana a saan pay a masinunuo ti taray ti situasion ngem nakasagana ti Israel iti aniaman a posible a mapasamak apaman a maminsan manen a bumara ti nalawlawa a gubat iti rehion.
