LAOAG CITY – Inrakurak ti Department of Migrant Workers (DMW) nga ado dagiti overseas Filipino workers (OFWs) ti napukawan ti trabaho gapu iti gubat iti Middle East.
Iti maysa a press briefing, kinumpirmaran ni Department of Migrant Workers Undersecretary Jainal Rasul Jr. a sumagmamano kadagiti Overseas Filipino Workers ket permanente a napukawan ti trabaho idinto a dagiti dadduma ket temporaryo naisardeng ti panagtrabaho da.
Mainaig iti daytoy, nangidanun ti ahensya ti tulong kadagiti apektado nga overseas workers ken inaramid a simple ti wagas ti aplikasyon tapno maala ti tulong pinansiyal nga agbalor ti $200 wenno katukada ti ₱12,100, nga aggapo iti AKSYON Fund ti ahensiya.
Tapno magundawayan ti nasao a cash aid, kasapulan laeng a mangisumitir dagiti apektado nga overseas Filipino workers ti request for assistance form, kopya ti pasaporte, pammaneknek iti overseas employment kas ti kontrata, visa, labor card ken ti pammaneknek a napukawan dagitoy ti trabaho wenno work disruption kas ti certification manipod iti employer, payslip, notice of termination, visa cancellation no adda, self declaration ti apektado nga OFWs, certification ti Filipino community, ken dadduma pay.
Kabayatanna, inrakurak met ni Department of Migrant Workers Secretary Hans Leo Cacdac nga umaboten iti pakabuklan a 6,706 angti na-repatriate no sadinno a 5,023 ditoy ket dagiti Overseas Filipino Workers idinto a 1,343 ti dependents da, adda pay ti 340 a turista ken dadduma nga overseas Filipinos.
Kadakkelan a bilang dagiti na-repatriate ket manipod iti Dubai, sumaruno ti Kuwait, Abu Dhabi, Qatar, Bahrain, Riyadh, Al Khobar, Israel, Jeddah ken Oman.
Malaksid iti daytoy, adda pay dagiti Overseas Filipino Workers nga aggapo iti Middle East ti manamnama a sumangpet kadagiti sumarsaruno nga aldaw.
