LAOAG CITY – Inanunsio ti Japan Meteorological Agency (JMA) ti baro a kategoria para iti nakaro a kinabara ti panawen no sadinno a dagiti temperatura nga umab-abot iti 40°C agpangato ket maawagan a “cruelly hot” wenno “kokusho-bi.”
Gagem ti baro a termino nga ad-adda nga epektibo a makaballaag iti publiko kontra iti narisgo a nangato a temperatura kabayatan nga agtultuloy a ngumatngato ti bilang ti heatwave days iti pagilian.
Iti napalabas a tawen, nairekord ti Japan ti kabaraan daytoy a summer wenno panawen ti kalgaw sipud pay idi 1989 a mangipasimuaag ti agtultuloy a panagbara ti klima.
Naammoan a ti baro a nagan ti kategoria ket basar iti insayangkat a survey ti Meteorological Agency ti pagilian a nakaala daytoy ti 478,000 a sungbat manipud iti publiko. Kaadoan ditoy ti “cruelly hot,” a sinaruno ti “super-extremely hot day” wenno “cho-mosho-bi.”
Karaman pay kadagiti singasing dagiti Hapon ket ti “sauna day,” “stay-at-home day,” ken “boiling day.”
Ti baro a klasipikasion ket mainayon iti maipatpatungpal a sistema ti Japan Meteorological Agency no sadinno ti:
25°C agpangato ket maibilang a “summer day”
30°C agpangato ket “midsummer day”
35°C agpangato ket “extremely hot day”
Iti babaen ti baro a label, namnamaen ti ahensia nga ad-adda nga agbalin nga alerto ti publiko kadagiti narisgo a tukad ti pudot a mabalin a mangitunda ti heat-related illnesses.
