LAOAG CITY – Agtultuloy a maap-apektaran ti kalidad ti angin idiay Metro Manila gapu kadagiti “smoldering conditions” manipud iti uram iti Navotas landfill a nangrugi idi Abril 10.
Basar iti Philippine Space Agency (PhilSA), saan pay a nagsubli iti normal a tukad ti kalidad ti angin basar iti satellite monitoring-da.
Naammoan a dagiti satellite data ket mangipakpakita ti nangato a tukad ti nitrogen dioxide (NO2), maysa a pollutant a resulta ti pannakauram a nangatngato pay ngem idi Abril 6 sakbay a nangrugi ti uram.
Ti Valenzuela City, karaman kadagiti ad-adda a naapektaran a lugar ket nakairekord ti “very unhealthy” wenno 177 Air Quality Index (AQI).
Nabalakadan dagiti residente nangruna kadagiti adda ti sakitna iti puso wenno bara nga agtalinaed iti uneg ti pagtaengan ken liklikan ti air pollution.
Nangidatag ti field hospital ti Department of Health (DOH) idiay Obando, Bulacan tapno agmonitor ti salun-at kadagiti naapektaran a residente.
Ti Department of Environment and Natural Resources (DENR) ket agtultuloy ti monitoringda iti air quality idinto a dagiti otoridad ket mangisaysayangkat kadagiti addang tapno matagiben ti salun-at ken aglawlaw gapu iti epekto ti uram.
