LAOAG CITY – Inpakita da North Korean leader Kim Jong Un ken ni Russian Defence Minister Andrey Belousov ti pakalaglagipan idiay Pyongyang para kadagiti North Koreans a pimmusay iti pannakilaban da kabayatan ti gubat iti Ukraine.
Nagtayab dagiti jet ti militar iti ngato ken nairuwar dagiti puraw a balloon iti tangatang bayat nga inbuksilan da Kim ken Belousov ti maysa nga estatua ken nanglukat da iti pakalaglagipan a museo.
Saan nga ammo no mano a soldado ti North Korea ti makilablaban iti Ukraine, ngem patta-pattaen ti South Korean intelligence a sumuruk-kumurang a 15 ribo ti naibaon a tumulong iti Russia a mangsakup manen kadagiti paset ti akindaya a Kursk.
Pattapattaen pay ti Seoul nga agarup 2,000 nga North Koreans ti natay iti pannakilaban da iti Ukraine.
Kas kasukat ti panangipaay ti North Korea ti soldado na iti Russia, mapapati a ti komunista a pagilian ket nakaawat ti kwarta, taraon ken technical a tulong manipod idiay Moscow.
