LAOAG CITY -Napnuan ragsak ti naiwayat a victory party kas panangipaay ti pammadayaw iti Schools Division Office-Laoag City aglalo kadagiti atleta gapu iti panagkampeon da iti maikatlo a nagsasaruno a gundaway iti Region 1 Athletic Association Meet.
Segun kenni Mr. Hipolito Salva Jr., ti mangidadaulo iti Sports Development Office ditoy ciudad ti Laoag, kadwa da a nagselebrar ti gobierno lokal ditoy ciudad.
Kunana a ti selebrasyon ket inatendaran dagiti medalists, coaches, trainors ken ti sibubukel a Laoag Team ti 2026 Region 1 Athletic Association Meet (R1AA) iti Laoag City Multi-Purpose Hall.
Inrakurak na a kabayatan ti victory party ket naited ti cash incentives dagiti atleta manipud iti Laoag City Government no sadinno a naikkan ti P3,000 dagiti gold medalist, P2,000 silver medalist ken P1,000 para met kadagiti bronze medalist.
Para ti Schools Division Office-Laoag City, ti balligi manen ti Laoag Team ket gapu ti panagbibinnulig iti tunggal maysa.
Mainaig iti daytoy, kabayatan ti nasao nga aktibidad ket nagyaman ni Mayor James Bryan Alcid ken binigbig na a ti Laoag ti “Home of the Champions”!
Innayon na nga agtultuloy ti suporta ti gobierno siudad iti sports ken kunana a no ania dagiti kasapulan pay dagiti atleta ket ipaay ti administrasion na tapno mapagtalinaed ti kampeonato ti Laoag City.
Maipalagip a naideklarar a kampeon ti Team Laoag iti kalepleppas a Region 1 Athletic Association Meet idiay Candon City, Ilocos Sur kalpasan a nakagun-od da ti 93 gold medals, 70 silver medals ken 62 bronze medals.
