LAOAG CITY – Binigbig ni Presidente Ferdinand Marcos Jr. dagiti napateg a kontribusion dagiti mangmangged a Pilipino iti panagdur-as ti pagilian ita a Labor Day.
Segun iti Presidente, dagiti mangmangged ti pudno a pigsa ti ekonomia aniaman nga oras ken klase ti trabaho.
Inbatadna nga iti kinagaget ken sakripisio dagiti mangmangged ket tumibtibker ti pamilia ken ti intero a pagilian.
Inallukoyna ti gobierno ken pribado a sektor nga agtinnulong tapno masigurado nga adda ti umdas a sueldo, benepisio ken oportunidad dagiti mangmangged.
Inpasigurado ti Presidente nga agtultuloy nga ipangpangruna ti administrasionna ti panangpartuat ti trabaho ken natibtibker a proteksion para kadagiti mangmangged.
