LAOAG CITY – Inlungalong ni Senador Loren Legarda ti natibtibker a proteksion para kadagiti mangmangged nga agtultuloy a mangbibiag iti ekonomia iti baet ti dakes a panawen wenno kalamidad.
Dinakamat ni Legarda dagiti mangmangged iti transportasion, suplay ti taraon, salun-at, utilities, media, retail, konstruksion, agrikultura, edukasion, pampubliko a serbisio ken dadduma pay a sektor nga agtultuloy nga agtrabtrabaho iti baet ti napigsa a bagyo.
Inpetteng ni Legarda ti kasapulan a maipaayan ti nainkalintegan a sueldo, natalged a kondision iti trabaho ken umdas a suporta iti nayon a risgo ken gastos ti nasken a maipaay kadagiti nasao a mangmangged nga agtrabtrabaho latta tunggal adda ti kalamidad.
Mainaig iti daytoy, inpanagawan ti Senadora ti insigida a panangpatibker ti Senate Bill 520 wenno ti Calamity Work Compensation Act a mangipaay ti nayon a 30 a porsiento iti inaldaw a sueldo dagiti pribado nga empleado a kasapulan nga ag-report on-site iti panawen a Signal no. 3, 4 wenno 5 ti bagyo wenno uray katukad ti epekto ti kalamidad.
Inpaganetget pay ni Legarda ti natibtibker a proteksion kadagiti informal, platform-based ken self-employed workers kas kadagiti delivery riders, drivers, vendors ken dadduma pay nga inaldaw ti panagbirokda a masansan a kasapulanda ti agtrabaho nupay napigsa ti tudo wenno adda ti bagyo.
