LAOAG CITY – Inpetteng ni House Deputy Speaker Paolo Ortega V ti La Union nga awan ti kasukat a kiddaw wenno bayad ti findings ti House Committee on Justice nga adda ti probable cause ti dua nga impeachment complaints kontra ken ni Vice President Sara Duterte.
Inpaganetget ni Ortega nga awan ti pagibasaran ken nalawag a panangiyaw-awan laeng iti isyu ti alegasion nga adda ti kasukat wenno adda ti pasuksok kadagiti miembro ti komite tapno umannugot iti panagpa-impeach ken ni Vice President Sara.
Kunana a ti agkaykaysa a desision ti 53 a miembro ti komite ket maibasar kadagiti ebidensia kas kadagiti dokumento, official records, sinapataan a salaysay ken naberipikar a financial documents a naiprisentar iti impeachment hearings.
Gapu iti daytoy, nagpanawagan ni Ortega iti publiko a saan nga ikankano ti rumrummuar nga istoria a gagem a ririboken ti proseso ti impeachment a nakaipalaon iti Konstitusion.
