LAOAG CITY – Nagtalinaed a positibo iti red tide toxin wenno paralytic shellfish poison ti kabaybayan a sakup ti Anda ken maysa pay nga ili idiay Pangasinan basar iti Bureau of Fisheries and Aquatic Resources (BFAR).
Gapu iti daytoy, saan latta a natalged a sidaen dagiti shellfish manipud kadagiti lugar iti daytoy.
Iti Shellfish Bulletin No. 9 a naiparuk-at, binalakadan ti Bureau of Fisheries and Aquatic Resources ti publiko a liklikan ti shellfish ken armang manipud kadagiti naapektaran a lugar.
Maipawil ti panagala, panagibiahe ken panaglako kadagitoy agingga a saan pay a naikkat ti ballaag.
Nupay kasta, inbatad ti Bureau of Fisheries and Aquatic Resources a natalged a sidaen ti ikan, pusit, kappe ken udang manipud kadagitoy a lugar no madalusan ken maluto a naimbag.
Addan ti sumurok dua a bulan a naapektaran ti red tide dagiti nasao a lugar ita a tawen.
