LAOAG CITY – Inbatad ti sumagmamano a Senador a target ti voucher program iti babaen ti Senate Bill No. 1981 a matulungan ti amin a “disadvantage learners’ a makaadal iti pribado a pagadalan iti babaen ti voucher program system.
Iti nagsisina a rakurak kalpasan nga inaprubaran ti Senado iti maikatlo ken maudi a pannakaibasa ti Basic Education Voucher Program Act, inbatad da Senador Alan Peter Cayetano Ken Senador Win Gatchalian a dakkel ti maitulong ti gakat kadagiti “disadvantage learners.”
Kunada a partikular a nailanad iti gakat a ti umuna a matulungan dagiti disadvantage learners kas ti persons with disabilities (PWDs), dagiti ulila, adda iti nasulimek a lugar, Indigenous People, ken benepisyaryo ti Pantawid Pamilyang Pilipino Program (4Ps).
Immunan nga inrakurak ni Senador Bam Aquino ti pannakaipasa ti gakat iti botos a 22 pabor Ken awan ti nangkontra iti pannakapatibker ti Senate Bill No. 1981 wenno ti nailungalong a Basic Education Voucher Program Act.
Ti kangrunaan nga author ken co-sponsor ni Gatchalian it nailungalong a gakat a naadaw iti Senate Bill No. 422 ni Cayetano, wenno ti The Learner’s Choice (TLC) Act of 2025, a gagem na a maipaayan ti subsidiya dagiti kwalipikado nga agad-adal tapno mapastrek iti aniaman a DepEd-recognized private school iti babaen ti maysa a voucher.
