Binabalaw ni Vice Mayor Remigio Medrano a saan a napintas ti panangidaulo ti Sanggunian Kabataan Federated President a ni Honorable Kian Chenzen Molina iti ili ti Sarrat.
Daytoy ket kalpasan a maobserbaranna ti saan a panagkaykaysa dagiti Sanggunian Kabataan Officials iti nasao nga ili.
Kinunana a no maipanggep iti pundo ket adu dagiti saan a mau-usar gapu ta saanda nga ammo ti pakausaranna dagitoy.
Malaksid iti daytoy, kinunana a no napintas ti panangidaulona ket rumbeng nga adda ti panagtataripnong dagitoy tapno mailawlawag ken matalantan dagiti problema a masapul a masolusionan.
Segun ken ni Medrano, kanayonna nga kiddawen ti SK Federated President a mangurnos ti regular meeting gapu ta mamati a napateg daytoy a wagas.
Kinunana a ti naudi a panagtataripnong ket uppat laeng miembro ti nagatendar.
Innayonna pay nga adu dagiti maidandanon a problem iti opisinana ngem mangipapaay daytoy ti oportunidad iti SK Federated President tapno solusionna dagitoy.
Kabayatanna, inpanamnama met ni SK Federated President Molina a kabayatan ti regular session-da ket mangaramid daytoy ti addang tapno masolusionan dagiti agdama a problemada.
