LAOAG CITY – Kinontra ni Senador Ronald ”Bato” dela Rosa ti panawagan ti lima a padana a senador a boluntario a sumuko iti International Criminal Court (ICC) kagiddan ti panangipettengna a saan nga agpaarestar isuna kabayatan nga agtultuloy ti panagusarna kadagiti legal remedy.
Inbatadna a saan daytoy a sumuko ken ginutigotna dagiti author ti Senate Resolution 395 a saanda nga agal-alisto iti panangarestar kenkuana.
Ti nasao a resolusion ket immunan nga inpila da Senate Minority Leader Vicente “Tito” Sotto III, Senador Panfilo Lacson, Risa Hontiveros, Francis ”Kiko” Pangilinan ken Bam Aquino.
Kuna ti senador a mamati daytoy a kaadoan kadagiti Pilipino ket kontra iti ideya nga isuna ket maikabil iti International Criminal Court.
Nadismaya ti senador iti panawagan ti sumagmamano a padana nga agpanpanday linteg nga isuna ket sumuko ken ad-adda a nasaktan daytoy idi nakitana a maysa ni Lacson kadagiti nagpirma iti resolusion.
