LAOAG CITY – Kalikagum ni Mrs. Mary Jane Leaño, mangidadaulo ti City Tourism Office ditoy siudad ti Laoag ti ad-adda pay a pannakaitandudo ti Sports Tourism ditoy siudad.
Segun kenkuana, dagiti atleta ket addaan ti komunidad a no adda dagiti mabalinda a pakipartisiparan wenno pakilabanan ket ikagumaanda ti mapan.
Inbatadna a kas ti Tour of Luzon ket makita nga adu dagiti nakipartisipar ditoy uray adda ti krisis ngem gapu ta kayatda ti ar-aramidenda ket saan a nagbalin a lapped daytoy kadakuada.
Mainaig iti daytoy, kuna ni Leaño a no adda dagiti singasing maipanggep iti kastoy ket akomodarenda nga insigida ken ditoy maadal ken mapagsasaritaan sakbay a maiyuswat.
Innayonna a saan laeng a nakapokus ti pananggutigot kadagiti turista ken panangpapintas kadagiti pagpasiaran no diket karaman pay ditoyen ti agri tourism, sports tourism, eco tourism ken dadduma pay.
