LAOAG CITY – Nagkedkedan ti Hezbollah ti sabali manen a katulagan iti ceasefire iti nagbaetan ti Israel ken Lebanon a suportado ti Estados Unidos a gagem nga ipatungpal ti baro a ceasefire iti dua a pagilian.
Inbatad ti lider ti Hezbollah a ni Naim Qassem a ti negosasion ket awan ti serserbina ken nakababain para iti Lebanon ken inpettengna a nagkedked ti nalawa a sektor dagiti umili ti pagilian.
Immuna iti daytoy, inanunsio ti Israel ken Lebanon ti maminsan manen a panangipatungpal ti nakapsot ken temporario a ceasefire a pakairamanan ti panangestablisar kadagiti “pilot” security zones iti uneg ti Lebanon a maipawil ti presensia dagiti operatiba ti Hezbollah.
Iti nagtitipon a rakurak ti Estados Unidos, Israel ken Lebanon, nakailanad a ti katulagan ket nakadepende iti panagsardeng ti panagpinnutok ti Hezbollah.
Nupay kasta, inpaganetget ni Qassem a ti maaw-awagan a ceasefire ket katukad ti panagsuko ken agserbi laeng iti gagem ti Israel partikular ti panagsanud dagiti puersa manipud iti pagpatinggaan ti abagatan.
Kabayatanna, nagtalinaed a gudua ti opinyon iti publiko iti Beirut partikular kadagiti lugar a maibilang a kuta ti Hezbollah nga adda dagiti residente nga agdudua iti epekto ti katulagan ken mamati a saan a mabalin a mapasamak ti ceasefire no maysa laeng kadakuada ti agtungpal.
