LAOAG CITY – Inpakaammo ni Laoag City Vice Mayor Rey Carlos Fariñas a dakkel ti epektona iti mapaspasamak a riribok iti Senado iti panangallukoy kadagiti investors manipud iti sabali a pagilian.
Segun kenkuana, masapul ti panagtitinnunos iti tumunggal maysa nga agpanpanday linteg nangruna kadagiti Senador uray aniaman a grupo wenno partido ti pakaibilanganda.
Inbatadna a nasken laeng a saan a maapektaran dagiti panangputar kadagiti gakat ken pannakaipasa kadagiti linteg gapu laeng kadagiti panagginnura wenno panagririri.
Inlawlawagna nga awan ti sabali nga ad-adda a maapektaran no diket dagiti naruay nga umili wenno dagiti Pilipino.
Inpettengna nga awan ti kanununganna kadagiti Senador ngem masapul a kanayon nga ipangpangrunada ti pagsayaatan ti kaadoan sakbay ti bukudda nga interes.
Innayonna nga adda pay dagiti padana a local officials ti agkalikagum a mangipaay ti komento mainaig iti tension ti Senado ngem kunana a nasaysayaat lattan no ikararaganda isuda nga agkaykaysa.
